Duket e thjeshtë, kur e mendon! Duket madje fare banale dhe pa rëndësi, kur kalon nëpër mend idenë se midis një pune e një tjetre në jetën tënde, kur shtëpia të thërret me të madhe për pastrim e mirëmbajtje ( se duket sikur 24 orarshi, nuk është më i mjaftueshëm ), të kërkosh një zonjë nëpër lagje, një nga këto shtëpiaket që mendon se s’kanë asgjë më të mirë për të bërë me jetën e tyre , që ta paguash pak e t’i kërkosh të ta bëj shtëpinë pasqyrë, të tingëllon shumë komode dhe praktike. Dhe i gëzohesh ambientit tënd të banimin kur kthehesh mbasditeve, sapo vë çelësin në derë dhe ndjenë aromën e pastërtisë dhe detergjentëve. Madje, pavarsisht ditës që mund të kesh kaluar në zyrë / profesion ( shumë stres, presion, afate për tu përmbushur, vëmendje në procese etj ), fëmijëve, familjarëve apo çdo elementi tjetër që formon jetën tënde, thjesht nga ky detaj, aroma e pastërtisë kur shkel në një ambient të pastruar mirë, të bën të mendosh instiktivisht thjesht : sa mirë, ka lezet…ka zgjidhje për gjithçka sot! Hej, jeta qenka e bukur!
Mendësia prej shqiptari nuk të lejon të shijosh edhe gjërat e thjeshta, të zakonshme, të përditshme. Pavarsisht emancipimit të kohëve dhe gjinive, kulturës dhe normave shoqërore, kryesisht në zonat urbane ( zonat rurale janë ende larg kuptimit të shërbimeve të mirëmbajtjes dhe kujdesit në familje ), steriotipet që na janë ngulitur në mendje ( po nuk mësove shumë, do kapësh fshesën tër jetën ), dashur pa dashur, pavarsisht arsimimit dhe idesë së të qënit sa më të hapur mendërisht, do të na bëjnë ende të shohim shtrembër ata individë, që për 101 arsye ( arsimim i ulët, nuk kanë një zanat, vijnë nga zona të thella rurale, nuk ju ka ecur kurrë në jetë dhe duhet të bëjnë gjithçka për të mbijetuar etj ) zgjedhin të përfshihen në shërbim mirëmbajtjeje në familje si pastrim, kujdestari për fëmijë ose kujdestari për të moshuar. Mund t’i shihni shtrembër kur jeni në bank duke kryer pagesat e faturave tuaja, madje edhe të pyesin “Si ja bëjnë vallë?”, kur vini re zonja shumë të reja, me uniforma, me kokën ulur dhe shtupën në dorë…Shpesh herë nuk e bëni me qëllim dhe as me tendencën për t’i përbuzur, përkundrazi! Shpesh herë në të tilla kohë, e gjeni veten edhe duke menduar se nuk ka fare rëndësi profili punës, për sa kohë puna është me nder dhe se nuk i dihet si të hedh i madhi Zot, nga një ditë në tjetrën. Por prap, mund të ndodh t’i shihni shtrember ose t’i punësoni këto zonja në ambientet tuaja të banimit / punës, të kënaqeni dhe gëzoni me shërbimin e tyre të mirë ( sepse kur të kthehesh nga puna jote me kokën që të zienë, të vjen jashtëzakonisht shumë mirë, që nuk do të të duhet të ndërrosh çarçafët apo gërryesh sobën ku ke derdhur qumështin në mëngjes ), por prap të ketë diçka që t’ju pengoj t’i vlerësoni siç duhet!
Që do të thotë se kur zgjidhni t’i besoni fëmijën, shtëpinë apo nënën e moshuar një zonje që ofron shërbime mirëmbajtjeje dhe kujdestarie në familje, praktikisht po zgjidhni me vetëdije të besoni në duart e saj gjërat më të shtrenjta në jetën tuaj! Prandaj duhet të ndërgjegjësohemi dhe të fillojmë t’i konsiderojmë profesione të mirëfillta dhe me rëndësi, ashtu si çdo lloj tjetër profili shërbimi. Që do të thotë që patjetër duhet të kërkoni cilësi të lartë, besueshmëri dhe përkushtim, se është punë me përgjegjësi të lartë, se po kërkoni të lehtësoni jetën tuaj për mirë! Por njëherësh duhet t’i vlerësoni në radhë të parë si individë duke i respektuar, me pagesë të përshtatshme dhe në raport të drejtë me pritshmërit tuaja ( jo thjesht dhe vetëm me idenë se tregu kaq është ), pse jo mos të vlerësoni apo merrni në konsideratë edhe idenë e punësimit konform ligjit dhe kodit të punës në Shqipëri. Në këtë mënyrë, ju jeni duke marr masat më të larta drejt sigurisë! Mbani përgjegjësi dhe kërkoni përgjegjësi. Mbi të gjitha, nëse jeni në pozita financiare, që ju lejojnë të krijoni pozicione dhe profile të reja pune dhe shërbimesh, duhet të ndjeheni krenar për veten tuaj, që përveçse arrini të siguroni mirëqënie dhe standart të mirë jetese për veten dhe familjen, nëpërmjet këtyre shërbimeve që kërkoni, po arrini të krijoni gjithashtu mundësi të mëdha punësimi edhe për individë të tjerë, në kushte të tjera jetese. Dhe në fund të fundit, me kohët moderne dhe zhvillimin e profesioneve që më parë nuk kanë ekzistuar në mendësinë tonë, edhe ky profil pune është interesant dhe gjithmonë e më shumë, ndërgjegjësohemi se është i domosdoshëm për të gjitha palët në një shoqëri të qytetëruar!