Të gjitha tezet kanë një vend special në zemër për nipër / mbesat e tyre, që e ruajnë me besnikëri dhe fanatizëm. Është një kategori e veçantë lidhëse dhe disi e vështirë për tu përshkruar me fjalë.
Kur fëmijët bëhen të vetëdijshëm për faktin që kanë një ose më shumë teze dhe atë çka ajo përfaqëson në jetën e tyre, këta çapkën të vegjël janë gjithmonë gati t’i falin asaj një lloj dashurie të veçantë. Tezet shpesh bëhen shoku / shoqja më e mirë dhe kryesisht aleati besnik. Tezet gjithmonë i mbrojnë nipërit / mbesat e tyre, mbajnë me vete artileri të mjaftueshme ëmbëlsirash dhe kurrë nuk të spiunojnë tek prindërit për vogëlsirat. Madje në të tilla raste, janë të gatshme të marrin përsipër vetë ‘fajin’ e ndodhur nga pakujdesia, si përshembull kur fëmijët derdhin pa dashje një lëng frutash në sediljen e pasme të makinës, rrugës për në plazh.
Sigurisht që tezet nuk janë aty për të minimizuar ose eklipsuar rolin e prindërve, por janë aty për të plotësuar dhe lumturuar jetën e nipërve të saj. Të jesh teze është një nga rolet më të bukur në botë sepse :
1. Janë gjithmonë argëtuese
Është gjithmonë e gatshme të shikoj filma vizatimor, të lyej flokët me bojëra, të lyej thonjtë, të lexojnë përralla, të kërcejnë së bashku me të vegjlit tuaj dhe nuk përton thuajse kurrë t’ju shëtisë lartë e poshtë. Vetëm tezja duket se e merr përsipër të sillet si fëmijë sa herë shpenzon kohë me nipërit ose mbesat e saj.
2. Tezja është një model
Tezja është gjithmonë e sjellshme, argëtuese, ka sens humori dhe është gjithmonë në krahë të nipit / mbesës. Të vetëdijshëm ose jo për modelin e saj në familjen tuaj, tezja është ngahera një model i mirë për tu marr shembull nga ana e fëmijëve tuaj.
3. Tezja është një person i besueshëm
Gjithçka që fëmijët, e veçanërisht ata në fazën e adoleshencës, nuk do të jenë në gjëndje t’jua shprehin prindërve, me tezen gjëja ndryshon dhe bëhet më e lehtë për tu rrëfyer. Tezja konsiderohet person i rritur më pak paragjykues dhe i besueshëm prandaj fëmijët e tu, do të kenë shumë pak sekrete me tezen.
4. Tezja ka gjithmonë leje të llastojë nipërit /mbesat e saj dhe për këtë nuk kërkon leje
Roli i prindërve është të rrisin fëmijët sa më mirë të jetë e mundur, duke u përpjekur të ruajnë balancat. Ndërsa roli i tezes është t’i llastojë ata nga pak, sa herë t’i jepet rasti. Një çokollatë e vogël ose edhe dy, kur prindërit nuk janë shumë pro këtyre ushqimeve; të qëndruarit zgjuar mbrëmjeve pak më vonë në fundjavë se orari caktuar; dhurata të vogla pa një arsye të veçantë …gjithçka është e mundshme të ndodh me tezen. Ajo mund të mos i blejë vetes diçka që do, por me siguri do të blejë për princin / princeshën e saj diçka të bukur, pa e vënë re fare çmimin, në shumicën e rasteve. Tezet sigurisht nuk e zëvendësojnë dot nënë ose të dy prindërit, por ato janë personat më të rëndësishëm në jetën e fëmijës tuaj, menjëherë pas jush!
